|
Ас йӧз йылысь серпасторъяс
Тайӧ мортсӧ ме тӧда важӧнсянь нин. Сылы 72 арӧс, но некор весь оз ов. Уна во чӧж Иван Александрович вӧчаліс бур додьяс, крепыд мегыръяс, сиктса йӧзлы да учреждениеяслы тэчис пачьяс, со и таво ар на сиктса клубын, магазинын, детсад-яслиын выльмӧдіс кымын пач. Кузь туй да сьӧкыд олӧм тӧдліс сійӧ. 18 арӧсӧн муніс гражданскöй война вылö, тышкасис барон Врангельлӧн войскалы паныд паськыд украинскöй степьясын. Ранитчывліс. Великöй Отечественнöй война дырйи гындіс-нӧйтіс фашистъясӧс Ленинград дорын. Ранитчӧм бӧрын воис гортас. Агния Николаевна гӧтырыскӧд сійӧ быдтіс квайт челядьӧс. Ставныс нин найӧ асшӧр олӧм олӧны, быдтӧны челядьӧс. Нэм чӧжыс мырсис крестьянскöй удж бердын, прӧмышляйтіс. Таво ар на кыйис 100 сайӧ ур, но вӧралігас суис неминуча — доймис. Бурдӧдчас да уна буртор на вӧчас сиктса йӧзыдлы сійӧ.
Кык Краснöй Звезда орден да медальяс пӧртмасьӧны сылӧн морӧс вылын. Отечественнöй войналӧн фронтъяс вылын Михаил Васильевич командуйтіс взводӧн. Аслас боецъяскӧд сійӧ зырис гитлеровецъясӧс Украинаса, Польшаса муяс вылысь. Сьӧкыда ранитчӧм петкӧдіс сійӧс стройысь война помасян лунъясӧ нин, Берлин дорын. Вöвлöм фронтовик война бӧрын уджаліс колхозса председательӧн, счетоводöн, бригадирӧн. Ӧні во-мӧд нин договорöн кыйӧ звер-пӧтка, чери. Удал кыйсьынытӧ сійӧ. Сы мында чери сиктад некод оз кый. И звер-пӧткаыд сюрӧ: неважӧн на прӧмыссӧ сдайтіс 680 шайт дон, кыйис 320 ур да 12 кунича. Ыджыд семьяыс Михаил Васильевичлӧн: 11 ныла-пиа. На пиысь витсö гӧтырыскӧд, Елена Александровнакӧд, сувтöдісны нин кок йылӧ: найӧ ӧні уджалӧны лесопунктын, учреждениеясын. Волывла ме Михаил Васильевич ордӧ. Казьтывлам сыкöд ылӧ кольӧм гымакылан биӧн да тшынӧн ыпъялысь фронтöвöй туйяс, асланым боевöй ёртъяс йылысь. Долыд овлӧ сьӧлӧм вылын ӧнія кадся шуда да гажа олӧм вылӧ. Степан Андреевич Нестеров. Снимок вылын : Иван Александрович Напалков, Михаил Васильевич Напалков. Ленин туйöд, 1972, Декабр 19 лун. |
